زلاغيطنا الشامية ...بيلي بنحبهن محكية ...
بالقلب محفورة ... وأبد .. مالها منسية ..
بوجودها أعراسنا هنيّة ...
وليالينا " بالليليش " غنيِّة ..
بالصيف .. ما أحلاها ..
وبيكتر ... فيّو .. صداها ..
سبحان من سوَّاها ..
وميزة أهل الشام خلاَّها ......
كل بلد إلو طباعو ...... ومواويلو ...
والفرحة ملوّنة ....... ولكل واحد تهاليلو ..
وهَيْ فرحة أصليّة .. والله بالتَّمام شامية ...
بلون السكر و الياسمين مضوية ..
بتنعنشْ الروح .. والأذن منها مروية ...
وبعدها قلوب العشَّاق .. من الحسرة " مشوية " ..
الكل لا بد وسمعها ..
عل البلكون أو بالتلفزيون حضرها ...
بباب الحارة ...
الخوالي ..
وبليالي شامية ... شافها وشاركها ...
... وهَي أحلا زلاغيطنا المشهورة ...
و بالفصحى بتتسمى " زغاريدنا " المعمورة ...
جعل ربي أيامنا بالصحة والفرح ...مغمورة .......
· أويها ....... عاللعلعي عاللعلعي
أويها ....... ويا صبايا تجمعي
أويها ....... ويا ليل طول طول
أويها ....... ويا شمس لا تطلعي
وللللللللييييييييش
· أوها ....... صلوا عالنبي
أوها ....... وزيدوا صلاتو
أوها ....... واللي مابيصلي عالنبي
أوها ....... تطق مرارتو
وللللللللييييييييش
· أوها ....... طبخنا مجدرة
أوها ....... وجللناها بالبصل
أوها ....... واللي مابيحبنا
أوها ....... على بيتو مابيصل
ولللللللللييييييييييش
· أوها ....... على شجرة بيتنا في رمانة
أوها ....... حامضة ولفانة
أوها ....... وحلفنا مانقطفا
أوها ....... لتتجوز (فلانة) بالسلامة
وللللللللييييييييش
· أوها ....... وديارنا كبيرة
أوها ....... ودرج الحمام فيا
أوها ....... وأم العريس فرحانة
أوها ....... الله يهنيها
وللللللللييييييييش
· أوها ....... ويا صحن نجاص
أوها....... ومكلل بالألماس
أوها ....... ويلي بياخذ بنت فلان
أوها ....... بيمشي مرفوع الراس
وللللللللييييييييش
· أوها ....... وبناتنا مخباية
أوها ....... ورجالنا مرباية
أوها ....... واجهازنا عالموضة
أوها ....... سجادة ومراية
وللللللللييييييييش
· أوها ....... وطبخنا مجدرة
أوها ....... ومجللة بالكزبرة
أوها ....... وعروستنا حلوة
أوها ....... ومابدها غندرة
وللللللللييييييييش
· أوها ....... (اسم العريس) يا واحد
أوها ....... (اسم العروس) ياتنين
أوها ....... وخرزة زرقا
أوها ....... ترد عنكون العين
وللللللللييييييييش
· أوها ....... وكسرنا بيضة
أوها ....... وطلعت بصفارين
أوها ....... وكل الناس بفرحه
أوها ....... ونحنا بفرحتين
ولللللللللليييييييييييش
· أوها ....... ويا صحن تين
أوها ....... ومجلل بالياسمين
أوها ....... وعروستنا صغيره
أوها ....... وما طبَّقت العشرين
ليليلييييييييييش
· أوها ....... وامشي دئا دئا
أوها ....... يا صنوبر منقّى
أوها ....... كل الفرحات بطالة
أوها ....... إلا فرحتنا من حقا
وللللللللييييييييش
· أوها ....... وساوينا مجدرة
أوها ....... وطلعت مدردرة
أوها ....... واللي مابحبك ياعروس
أوها ....... يقعد بسفل الطنجرة
ولللللييييييييييش
· أوها ....... ياخوخ بغبارو
أوها ....... ويا ورد بزرارو
أوها ....... واللي مابيحبك ياعريس
أوها ....... لتنخرب ديارو
وللللللييييييييييييييش
· أوها ....... أم العروس الله يعطيكي..
أوها ....... والسعادة بتواتيكي..
أوها ....... وعئبال فرحتك بالكمالة..
اوها ....... وبنجي بنكافيكي..
وللللللللييييييييش..
· أوها ....... الدهب بقفاصو
أوها ....... والألماس بجراصو
أوها ....... واللي بياخد من بناتنا
أوها ....... بيمشي وبيرفع راسو
وللللللللللييييييييش
ولأم العريس:
أوها ....... أم العريس أنا جوعانة..
أوها ....... وبدنا صفيحة مأمَّرة..
أوها ....... وإنشالله بتضلي سالمة..
أوها ....... وديارك معمرة..
وللللللللييييييييش
أوها ....... يا عريس لا تعبس..
أوها ....... فريد البئجة والبس..
أوها ....... شواربك عروء الريحان..
أوها ....... وسوالفها عروء النرجس..
وللللللللييييييييش
أوها ....... يا جماعة كلكون
أوها ....... وما نسينا فضلكون
أوها....... واليوم عنا
أوها ....... وانشا الله بكرة عندكون
ولللللللللييييييييييش
· أوها ....... تشي بشي
أوها ....... وطبخنا محشي
أوها ....... نحنا بيت فلان
أوها ....... وبيلبقلنا كل شي
ولللللللللييييييييييش
· أوها ....... يا صحن رز بحليب
أوها ....... كل مابرد بيطيب
أوها ....... وكلنا أهليه
أوها ....... ومافي حدا غريب
ولللللللليييييييييييييش
· أوها ....... وياما أعدو جنبي
أوها ....... وياما حرقوا قلبي
أوها ....... وقالوا ( فلان ) مابيتجوز
أوها ....... تجوز ونصرني ربي
وللللللللييييييييش
أوها ....... يا عريس ريتو مبارك
أوها ....... يا عريس السبع بركات
أوها ....... إنشالله لما يجيك الصبي
أوها ....... بتكمل الفرحات
وللللللللييييييييش
أكمل الله ليالينا بالفرح والنور على طول ......